«Մոզիլլա Հայաստան» թիմը՝ շուրջ 10 հայ երիտասարդներ, ամռան ամիսներից
կամավորական հիմունքներով սկսել են Firefox 4-ի հայաֆիկացման աշխատանքները։
Թիմի նպատակն է հայաֆիկացնել «Մոզիլլա» ոչ առեւտրային կազմակերպության
արտադրած ծրագրերը եւ դրանք հասանելի դարձնել հայերենով։ Այս մասին NEWS.am- Ինովացիայի
թղթակցի հետ զրույցում ասաց Mozilla Foundation-ի աշխատակից Ռոբերտ
Սարգսյանը, ով հանդիսանում է նաեւ «Մոզիլլա Հայաստան» թիմի ղեկավարներից
մեկը։
Ռ. Սարգսյանի խոսքով՝ Firefox 4 ծրագրի հայաֆիկացման գործընթացը գտնվում է վերջին փորձարկումների շրջանում:
«Հայաֆիկացման աշխատանքները կատարվում են «Մոզիլլա Ֆաունդեյշնի»
մասնագետների հետ համատեղ, ձգտելով հայերեն տարբերակը դարձնել «Մոզիլլայի»
պաշտոնական արտադրանք եւ այն ներգրավել «Ֆայրֆոքսի» պաշտոնական կայքում»,-
ասաց Ռ. Սարգսյանը՝ ավելացնելով, որ Firefox 4-ի հայերեն տարբերակն արդեն
դեկտեմբերից հնարավոր կլինի անվճար ներբեռնել Firefox –ի պաշտոնական
կայքից՝ www.firefox.com-ից։ Իսկ մինչ այդ ծրագրի փորձնական հայերեն
տարբերակը հասանելի է www.mozilla.am ինտերնետային կայքում։
Ի դեպ, «Մոզիլլա Հայաստան» թիմն իր նորամուծությունը ցուցադրում է Երեւանում ընթացող DigiTec Expo 2010 ցուցահանդեսում։